Триесет и шест организации за граѓански права и заштита на податоците тукушто го лансираа порталот на европската кампања за приватност privacycampaign.eu за поддршка на подобра заштита на правата на европските граѓани на приватност и заштита на податоците.
„Ова е наша можност за развивање силна законска рамка, градење доверба и отстранување на непотребните формалности за компаниите. Нам ни е потребна рамка базирана на јасни, предвидливи законски принципи и решително спроведување. Наместо тоа, имаме невиден бран на лошо информирано, неразумно и деструктивно корпоративно лобирање. Демократијата треба да се врати во оваа дебата со цел да ги заштити правата на европските граѓани“ вели Џо Мекнејми, извршен директор на Европски дигитални права.
Заедничката кампања лансирана од страна на Европската мрежа за дигитални права (којашто застапува 32 организации), Privacy International, Julia Group, La Quadrature du Net и Access има за цел создавање противтежа на масивното лобирање на американската влада, трговските здруженија и големите интернет-компании што се однесува до реформирањето на заштитата на податоци.
Организациите сметаат дека без успешна реформа на законската рамка за заштита на податоци европските граѓани ќе се соочат со голем број дупки во законот и голем број непредвидливи празнини во спроведувањето, а тогаш ниту граѓаните, ниту компаниите, нема да знаат кој закон ќе се спроведува.
Извор: ЕДРИ-грам „Fight back on data protection: Launch of European privacy campaign“ 5 февруари, 2013.
