На повеќе од 100 милиони граѓани на ЕУ ќе им биде полесно да ги користат јавните услуги на интернет за да бараат работа, да регистрираат автомобил, да поднесат даночна пријава и да аплицираат за пасош или возачка дозвола благодарение на новите правила предложени денес од Европската комисија по повод Меѓународниот ден на лицата со хендикеп.
Предлогот на Комисијата за Директива за пристапност на веб-локациите на органите од јавниот сектор донесе задолжителни функции за пристапност стандардизирани за ЕУ, од крајот на 2015 година, за 12 видови на веб-локации. Задолжителната пристапност ќе важи за суштинските владини услуги како што се социјално осигурување и здравствени услуги, барање работа, универзитетски апликации и издавање лични документи и изводи. Со предложените нови правила, исто така, ќе се разјасни што значи пристапност на интернет (технички спецификации, методологија за оценување, известување, тестирање) и владите ќе бидат поттикнати да ги применуваат правилата за сите услуги, а не само за задолжителните.
Клучни корисници на денешниот предлог би биле 80-те милиони европски граѓани со хендикеп и 87-те милиони постари од 65 години. На пример, лицата со оштетен вид ќе слушаат описи на сликите кога користат читач на екранот, а лицата со оштетен слух ќе гледаат титлови на датотеките со звук, а сите делови на веб-локацијата ќе може да се истражат преку тастатура и компјутерско глувче.
По спроведувањето, денешниот предлог ќе го отклучи европскиот пазар за веб-пристапност во вредност од околу 2 милијарди евра, пазар кој во моментот достигнува само 10 % од својот потенцијал. Иновациите поттикнати со предлогот исто така ќе го подобрат доживувањето на сите интернет-корисници преку поголема функционалност и пониски трошоци за обезбедување на таа функционалност.
Потпретседателот на Европската комисија, Нели Крос изјави: „Во денешно време речиси сите ние зависиме од пристапот до интернет во нашето секојдневие на еден или друг начин и сите имаме право на еднаков пристап до владините услуги на интернет. Со овој предлог тоа право ќе стане реалност, а не само идеја. Ќе се создадат подобри услови на пазарот, повеќе работни места и ќе биде поевтино за владите да ги направат своите веб-локации пристапни“.
Јанис Вардакастанис, претседателот на Европскиот форум за лица со хендикеп и се приклучи на Комисијата во поттикнувањето на напредокот: „Европскиот форум за лица со хендикеп ги поздравува предлозите за воведување законодавство за пристапност на јавните веб-локации, бидејќи со тоа ќе се придонесе за обезбедување на граѓанските права и за директен пристап на 80 милиони граѓани со хендикеп до јавните услуги, како прв чекор за отстранување на сите бариери за пристап до производите и услуги услугите на интернет во единствениот пазар“.
Благодарение на правилата за пристапност, програмерите ќе можат да ги нудат своите производи и услуги на целата територија на ЕУ, без дополнителни трошоци за приспособување и компликации.
Предложената Директива сега се поднесува за усвојување од Советот на министри на ЕУ и Европскиот парламент.
Земјите-членки ќе треба да ги воведат националните правила и прописи до 30 јуни, 2014 година. 21 земји-членки веќе имаат национални закони или мерки за пристапност на интернет, но напредокот е бавен.
Со денешниот предлог, Комисијата постапи согласно Акцијата 64 од Дигиталната агенда за Европа и членот 9 од Конвенцијата на Обединетите нации за правата на лицата со хендикеп (UNCRPD).
