CNIL (француската агенција за заштита на податоците) неодамна изврши серија проверки во врска со усогласеноста на Google со француското законодавство во однос на прибирањето податоци од Wi-Fi мрежи за неговите услуги Google Maps, Street View и Latitude на територијата на Франција.
Со проверките се открија неколку повреди на законот, меѓу кои и собирањето на WiFi податоци преку автомобилите на сервисот Google Street View без знаење на субјектите што ги поседуваат податоците, како и собирање на податоци од типот на податоци од лични карти, информации за најава, е-пораки и лозинки.
Во мај 2010 година, CNIL формално го извести Google за прекршоците и бидејќи компанијата официјално не одговори, на 17 март, 2011г. CNIL изрече глоба од 100.000 евра, највисоката казна што CNIL ја има изречено откако во 2004г. доби овластување да изрекува парични казни.
Според Google, собирањето на тие податоци било ненамерно и резултат на грешка. „Веднаш штом сфативме што се случува ги стопиравме нашите Street View возила“, изјави Питер Флејшер, советникот за глобална приватност на Google, кој додаде дека сите собрани податоци сега можат да се избришат.
CNIL потврди дека Google престанал да собира податоци за Wi-Fi преку своите „Гугл автомобили“ и ги избришал собраните податоци. Меѓутоа, агенцијата за заштита на податоци смета дека компанијата не се воздржала од употреба на податоците без знаење на нивните сопственици и, згора на тоа, продолжила да собира такви податоци без да ги извести сопствениците на податоците преку мобилните терминали на корисниците што се поврзуваат на услугата за гео-лоцирање – Latitude (паметни телефони, итн.)
„Тие не се секогаш подготвени да соработуваат со нас, не ни ги дадоа сите информации што ги побаравме, како на пр. изворниот код за сите уреди во Google автомобилите“ изјави Јан Падова, извршниот директор на CNIL кој додаде: „Тие не беа секогаш многу транспарентни“.
Google може да поднесе жалба во рок од два месеци.
- Google Street View: CNIL pronounces a fine of 100,000 Euros (21.03.2011)
- France fines Google over Street View data blunder (21.03.2011)
- EDRi-gram: Google admits it was gathering passwords and emails via StreetView (3.09.2010)
Извор: ЕДРИ-грам “French DPA fines Google for its Street View case with 100k Euro” бр. 9.6, 23 март, 2011.
