Microsoft соопшти дека на 17 европски невладини организации им доделува 1,5 милиони евра во готово како грантови за поддршка на младите во развојот на суштински работни вештини, а годинава доделува и вкупно 170 милиони евра во софтверски донации за НВОи и непрофитни организации низ Европа.
Оваа најнова инвестиција доаѓа во моментот кога Европа го одбележува почетокот на Неделата за е-вештини. Со грантовите, Microsoft ги зајакнува програмите за вработување и развој на работната сила дизајнирани за да им овозможат на младите пристап до технологија и обука за развој на ИТ вештините кои им се потребни за да бидат подготвени за денешниот пазар на труд. Софтверските донации се дел од долгорочните заложби на Microsoft да им помогне на организациите да ја користат технологијата за подобрување на нивното работење и за зголемување на продуктивноста.
Во време кога невработеноста на младите е највисока во историјата на ЕУ, со 22,4 отсто, потребата за поддршка е очигледна. „Младите луѓе се особено чувствителни на економските тешкотии“, вели Џон Вазало, потпретседател на Одделот за ЕУ на Microsoft. „Во Европа, секој петти млад човек во моментов не е вработен или никогаш нема работено. Бидејќи за повеќе од половина од работните места денес се бараат некакви технолошки вештини, важно е да се фокусираме на обучување на нашите млади генерации со потребните вештини за да бидат успешни на работното место“.
Насочувајќи се кон земјите во кои младите се најпогодени, како што се Шпанија и Грција, грантовите ќе ја надополнуваат работата на невладините организации со кои Microsoft веќе е партнер и ќе помогнат да се покренат нови иницијативи. На пример, во Грција, грантот ќе биде наменет за воведување нова младинска иницијатива за технологија, во соработка со Грчкото здружение на информатички професионалци, а со таа иницијатива на повеќе од 100.000 млади луѓе ќе им се обезбедат бесплатни можности на или вон интернет да ги подобрат своите вештини за ИКТ, бизнис и технологија и да се натпреваруваат за сертифицирање на основни и стручни нивоа. Во Шпанија, каде што невработеноста на младите е речиси 50 отсто, со грантот ќе се поддржи работата на Фондација Esplai за да се обучат повеќе од 6.000 млади луѓе, обезбедувајќи им ги потребните e-вештини и сертификати признати од индустријата, што би им овозможило да бидат конкурентни на пазарот на труд.
Софтверските донации ќе бидат поддршка за малите невладини организации низ Европа кои работат со ранливи групи или работат на каузите на заедницата. Во Европа, со програмата за софтверски донации управува TechSoup, која работи со локалните непрофитни партнери низ Европа.
„Денешното соопштение е доказ за континуираното инвестирање на Microsoft во Европа. Ќе продолжиме со нашите напори за зајакнување на НВОи и непрофитни организации, помагајќи им да добијат пристап до суштинската технологија и ресурси во денешната дигитална економија“, рече Вазало.
Добитници на грантовите:
- Белгија: COF – Centre d’Orientation et de Formation
- Франција: Unis Cités
- Грција: HePIS
- Италија: CNCA – Coordinamento Nazionale Comunità di Accoglienza
- Холандија: Stichting Computerwijk
- Норвешка: Norwegian Centre against Racism
- Полска: Information Society Development Foundation
- Португалија: Citeve
- Романија: Junior Achievement Romania, заедно со Education for Open Society и Asociatia TechSoup Romania
- Русија: PH International
- Словачка: Junior Achievement Slovakia
- Словенија: Ypsilon Institute/ Simbioz@2.0
- Шпанија: Fundacion Esplai
- Швајцарија: Gump & Drahtesel
- Украина: PH International
- Обединето Кралство: Prince’s Trust and Wise Group, Шкотска
