Европската комисија продолжува да врши притисок врз Советот и новиот Европски парламент за брзо усвојување на телекомуникацискиот пакет без соодветно прегледување на законот и без да ги земе предвид импликациите на Амандманот 138.
На состанокот во Луксембург одржан на 11 јуни, 2009 г., министрите за телекомуникации одлучија да го одбијат телекомуникацискиот пакет во формата усвоена од Европскиот парламент при второто читање на 6 мај, 2009 г., со што предложија нова рунда преговори.
Министрите сметаат дека Парламентот го прекршил претходниот компромис постигнат со Советот околу телекомуникацискиот пакет како целина, со тоа што очигледно главна тема било контроверзното прашање на заштитата на авторски права и правата на корисниците. Со новата одлука на францускиот уставен суд против францускиот закон за три предупредувања пред исклучување од интернет, Европскиот парламент веројатно цврсто ќе стои на својата позиција.
На прес-конференцијата одржана на 11 јуни, портпаролот на Вивиен Рединг – Мартин Селмајр го изрази ставот на Европската комисија изјавувајќи дека за Амандманот 138 се решавало на национално ниво (повикувајќи се на одлуката на францускиот уставен суд), така што тоа прашање повеќе не треба да се покренува во Европа. Тоа очигледно значи дека Комисијата сака амандманот да се исфрли од телекомуникацискиот пакет.
Рединг, која неодамна го поддржуваше ставот на Франција околу трите предупредувања, поднесе жалба до законодавците на ЕУ и побара да ги финализираат дискусиите за телекомуникацискиот пакет. „Ги повикувам сите политички играчи да сторат сè што можат во наредните денови и недели за да се реши ова последно отворено прашање. Критичарите често се жалат на недостигот од конкурентност во Европа, поради наводно долгото траење на процесите на донесување одлуки на ЕУ. Во наредните неколку денови и недели, Советот и Парламентот имаат шанса да докажат дека критичарите не се во право“.
Рокот за Европскиот парламент да го пренесе својот став околу телекомуникацискиот пакет до Советот е 19 јуни. По тој датум, министрите за телекомуникации имаат неколку опции. Една од нив е усвојување на текстот како што беше изгласан од парламентот но тоа е малку веројатно со оглед на нивниот став околу Амандманот 138, а особено позицијата на Франција во тој поглед.
Друга опција е да се усвои против-предлог со кој одново ќе се дефинира почетната позиција на Советот со која формално ќе се започне постапката на преговори за време на претседателството на Шведска со ЕУ. Во овој случај, парламентот ќе мора да формира комитет за усогласување, во кој ќе бидат вклучени 27 новоизбрани членови – претставници од сите земји во ЕУ. Официјална спогодба би можела да се постигне до крајот на годината.
Советот на Европа исто така би можел повторно да го отвори целиот случај и да побара преговори за суштината на текстот што би можело да доведе до други дебати со непредвидливо траење и резултати.
Би било технички изводливо пакетот да се раздели, но има слаби изгледи бидејќи министрите веќе изјавија дека таквото решение не им се допаѓа. Бидејќи текстот е поврзан, доколку се раздели тоа би значело дека ќе треба да се направат промени во голем дел од текстот. Планот на Европскиот парламент е да се има „тријалог“ на 29 септември, со конечно гласање на 15 декември со што би се добило време за дискусија околу прашањата покренати со Амандманот 138 и новите европарламентарци би можеле да се информираат околу овие прашања.
French ruling raises hopes for EU telecoms deal (11.06.2009)
http://www.euractiv.com/en/infosociety/french-ruling-raises-hopes-eu-t…
Commission steps up pressure on Telecoms Package (10.06.2009)
http://www.iptegrity.com/index.php?option=com_content&task=view&am…
Reding: don’t involve EU in fundamental rights (12.06.2009)
http://www.iptegrity.com/index.php?option=com_content&task=view&am…
Telecoms package remains hostage of political row (12.06.2009)
http://www.euractiv.com/en/infosociety/telecoms-package-remains-hostag…
Ministers braced for final round of telecoms talks (11.06.2009)
http://www.euractiv.com/en/infosociety/ministers-braced-final-round-te…
Presidency Press Statement on the state of play regarding the ‘telecoms package’ (12.06.2009)
http://www.eu2009.cz/en/news-and-documents/news/presidency-press-state…
EDRI-gram: European Parliament votes against the 3 strikes. Again (6.05.2009)
http://www.edri.org/edri-gram/number7.9/ep-plenary-votes-against-3-str…
