На 3 март, 2009 г., Сојузниот Уставен суд на Германија донесе одлука со која електронското гласање во текот на парламентарните избори од 2005 и во изминатите 10 години се прогласува за неуставно и нема да се применува на претстојните избори во септември, 2009 г.
Судот заклучи дека употребата на електронските машини е контрадикторна на јавната природа на изборите и дека опремата користена во 2005 имала некои недостатоци. Сепак, бидејќи нема докази за грешки во минатото, резултатите од претходните избори остануваат валидни.
Употребата на е-гласањето беше оспорена од политичкиот научник Јоаким Вајзнер и неговиот син, Улрих Вајзнер кој се пожали дека системот не бил транспарентен бидејќи гласачот не можел да провери што всушност се случило со неговиот глас, а од него се барало слепо да и верува на технологијата. Машините за гласање кои ги произведува холандската фирма Недап, не печатат потврди. Според мислењето на жалителот, би можело да се манипулира со резултатите.
Петицијата потпишана од преку 45.000 луѓе во 2005, која беше обид да се забрани е-гласањето, беше одбиена од германската влада. Сега, Судот одлучи дека Сојузната Уредба за гласачките машини со која се воведе е-гласањето била неуставна поради тоа што „не обезбедила дека ќе бидат дозволени и користени само такви гласачки машини коишто ги исполнуваат уставните услови на принципот за јавна природа на изборите.“
Судот исто така сметаше дека, за разлика од традиционалниот систем на гласање каде што манипулациите и измамите се многу потешки и подразбираат многу поголеми напори и се полесни за откривање, „програмерските грешки во софтверот или намерниот изборен фалсификат направен преку манипулирање со софтверот во електронските гласачки машини тешко може да се препознаат.“ Исто така, според мислењето на Судот, избирачите треба да можат да потврдат како нивниот глас ќе биде снимен без да имаат детално компјутерско знаење. „Доколку изборниот резултат е одреден преку компјутерски контролирана обработка на гласовите зачувани во електронска меморија, не е доволно доколку само резултатот од процесот на пресметување извршен од гласачката машина може да се запише преку резимирање од печатен материјал или електронски дисплеј.“
Кампања против електронско гласање беше иницирана од членот на ЕДРИ Chaos Computer Club заедно со холандската фондација Wij vertrouwen stemcomputers niet (не им веруваме на компјутерите за гласање) поради ризикот од електронски грешки и можноста за злоупотреба.
Откако на група хакери им успеа да упаднат во слични машини во Холандија во 2006, холандската влада забрани користење на машини за електронско гласање, како и Република Ирска.
German Court Rules E-Voting Unconstitutional (3.03.2009)
http://www.dw-world.de/dw/article/0,,4069101,00.html
Federal Constitutional Court – Press release on Use of voting computers in 2005 Bundestag election unconstitutional (3.03.2009)
http://www.bundesverfassungsgericht.de/en/press/bvg09-019en.html
Voting machines unconstitutional in Germany (3.03.2009)
http://able2know.org/topic/129942-1
EDRi-gram: Electronic voting machines eliminated in the Netherlands (24.10.2007)
http://www.edri.org/edrigram/number5.20/e-voting-machines-netherlands
Извор: ЕДРИ-грам „No e-voting in Germany“ бр. 7.5, 11 март, 2009.
