Të rinjtë që e shfrytëzuan krizën e koronës për storje të suksesshme biznesi

Gjatë krizës së koronës, disa të rinj panë mundësinë për të filluar bizneset e tyre ose për t’i përshtatur ato tashmë të filluara sipas “normales së re”, e cila u imponua nga masat kufizuese për mbrojtjen nga virusit.

Storjet që i treguan për “Meta.mk” sipërmarrësit nga Manastiri, Teona Mango, Goran Bakrevski dhe Darko Milevski, janë një shembull se ka edhe të rinj që e përballuan krizën në mënyrë kreative dhe pozitive.

Teona Mango është themeluesja e markës “Beyond Green” e cila është një markë eko-miqësore dhe e qëndrueshme, e themeluar në vitin 2020. Produktet janë bërë nga materiale ekologjike dhe të qëndrueshme, ndërsa ideja është të promovohet mënyra ekologjike dhe e gjelbër e jetesës, duke i zvogëluar mbeturinat dhe përdorimin e produkteve që e ndotin mjedisin jetësor.

“Kam jetuar në Londër deri në vitin 2020, kur filloi korona, u ktheva këtu dhe mbeta paplanifikuar tashmë një vit. Në karantinë, si të gjithë, kisha shumë kohë. Kur u ktheva për të jetuar këtu, vura re se sa e ulët është vetëdija ekologjike dhe sa nuk kemi produkte eko-të qëndrueshme, kështu që më lindi ideja për të filluar një markë të qëndrueshme eko-miqësore. “Koha e lirë që e kisha, nga ana tjetër, më mundësoi të hulumtoja dhe të gjeja se cilat produkte dhe cilat materiale janë më të mira, më të qëndrueshme,” thotë Mango, duke shtuar se kriza e koronës i ka ndryshuar gjithashtu edhe shprehitë e blerjeve.

“Njerëzit blinin në internet në vend se në dyqane, kurse të gjitha produktet e mia ishin në e-shop,” shton Mango.

Goran Bakrevski punon si dentist, por ky profesion ishte ndër të parët që u prek nga Kovid-19. Ai thotë se në tre muajt e parë të krizës, nuk ka punuar fare, kështu që kishte kohë të mjaftueshme për t’iu përkushtuar prodhimit të birrës “Bak”, e cila është 100 për qind natyrale.

“Ne kishim plane për zhvillimin e birrës familjare edhe para krizës së koronës, por e përshpejtuam punën gjatë krizës së Kovid-19, sepse kishim kohë të mjaftueshme. Vëllai im është mësues muzike, por edhe ai ishte në shtëpi. Gjatë asaj periudhe ne kemi punuar në mënyrë aktive në shijet e birrave dhe përmirësimin e teknologjisë së prodhimit. Njerëzit nuk dilnin jashtë, rrinin në shtëpi, kjo ishte një mundësi e shkëlqyeshme për t’i provuar shijet e produkteve. Atëherë e morëm mbështetjen e njerëzve të Manastirit. Të rinjtë në atë periudhë rrinin në rrjetet sociale ku bëmë një reklamë indirekte të produkteve” thotë Bakrevski.

Darko Milevski është një ish-futbollist dhe vetë profesioni kërkonte që ai t’i kushtonte vëmendje dietës së tij. Ka jetuar në Suedi, por u kthye në Manastir ku para tre vitesh hapi restorantin “Centar” për ushqim vegan dhe vegjetarian. Qëllimi, thotë ai, ishte edukimi i të rinjve për ushqimin e shëndetshëm, por edhe kthimi në rrënjët e vjetra, gjegjësisht që ushqimet bimore të jenë më të përfaqësuara në dietë.

“Kur goditi kriza e koronës, u shfaqën shumë vështirësi dhe u mbyllëm për gati pesë muaj. Në vitin 2020 mbijetuam disi, kurse në vitin 2021 ishte e rëndësishme të vazhdonim. Zgjedhja ishte që të pakësoheshin pak burimet, por të vazhdohej me intensitetin e njëjtë. Kjo është arsyeja pse bëmë rimarkimin dhe e krijuam “21/10 Fast & Healthy”, e cila është marrje e ushqimit (take away) të shpejtë dhe të shëndetshëm. Filluam në maj, kur ende kishte kufizime. Por, ne punuam edhe me ato kufizime, sepse kishim vetëm kuzhinën” – thotë Milevski.

Ai shton se kriza e koronës u ka dhënë atyre shtysë për të bërë ndryshim, sepse siç thotë ai, të gjithë vështirë i pranojmë ndryshimet dhe jemi mësuar me një zonë rehatie, por kjo i ka përshpejtuar disi gjërat. Milevski është i kënaqur me atë se si është i pranuar nga banorët e Manastirit, dhe dëshiron ta përhapë markën edhe në qytete të tjera.

“Të rinjtë eksplorojnë dietën e tyre, dhe ngadalë i ndryshojnë shprehitë e tyre” – përfundon Milevski.

Marrë nga meta.mk

Ndaje: