Ky dokument i politikave publike bazohet në gjetjet e hulumtimit që hulumtoi Zgjedhjet parlamentare të vitit 2024 në Maqedoninë e Veriut nga perspektiva e përfshirjes sociale, me fokus të veçantë te personat me aftësi të kufizuara dhe bashkësitë etnike. Personat me aftësi të kufizuara konsideroheshin në suaza të rrymës konceptuale socio-ekonomike, si një grup tejet i rrezikuar, i privuar nga ana sociale dhe politike për shkak të aftësive të tyre të kufizuara. Bashkësitë etnike u analizuan brenda rrymës së identitetit etnik, bazuar në supozimin se identitetet etnike ofrojnë bazë për distancë sociale.
Përfshirja sociale në procesin zgjedhor është vëzhguar në portalet informative të internetit si një nga platformat kryesore për shpërndarjen e informacionit, si një hapësirë për debat politik, si dhe një sferë ku ngrihen çështjet me rëndësi politike dhe sociale. Mediat onllajn në formësimin e opinionit publik, shërbejnë si kanale të rëndësishme për komunikim politik dhe platforma për reklamim politik. Gjatë zgjedhjeve, kjo hapësirë duhet të mundësoje pjesëmarrje të barabartë, të hapur dhe gjithëpërfshirëse, për aktorë të ndryshëm, në të cilën do të prezantohen opinionet e tyre dhe do të sigurohet një forum diskurziv për të gjithë, ku pjesëmarrja publike dhe politike e tyre ka hasur në vështirësi për çfarëdo arsye.
Qasja e metodës së përzier kombinonte analizën cilësore të thelluar të përmbajtjes me intervistat gjysmë të strukturuara të ekspertëve. Ka siguruar një vështrim gjithëpërfshirës dhe të thelluar në ndërthurjen e përfshirjes sociale, punës së mediave onllajn dhe strukturave politike, që reflektohet në komunikimin politik, nxitjen dhe informimin e gazetarëve lidhur me gjithëpërfshirjen/margjinalizimin social dhe kohezionin/distancimin etnik gjatë fushatës. Analiza e thelluar e përmbajtjes shqyrtoi në mënyrë cilësore artikujt e lajmeve, që u publikuan në 21 portale. Mostra ishte përzgjedhur paraprakisht lidhur me grupet e rrezikuara në analizën mediatike të kryer nga Fondacioni Metamorfozis, që monitoroi 30 portale interneti dhe 2 grumbullues lajmesh. Si plotësim, 15 intervista gjysmë të strukturuara u zbatuan me ekspertë të shquar në fushën e përfshirjes sociale, reklamimit politik, mediave dhe komunikimeve publike. Intervistat hulumtuan përfaqësimin e grupeve të margjinalizuara, narrativin e ndërtuar rreth tyre dhe ndërthurjen e përfshirjes sociale dhe reklamimin e paguar politik gjatë zgjedhjeve.
Ky produkt është përgatitur në kuadër të programit Paratë, mediat dhe zgjedhjet në Maqedoninë e Veriuti financuar nga Qeveria e Mbretërisë së Bashkuar me mbështetjen e Ambasadës Britanike Shkup. Përmbajtja e këtij publikimi nuk pasqyron domosdoshmërisht qëndrimin ose mendimet e Qeverisë së Mbretërisë së Bashkuar
