Fondacioni për Internet dhe Shoqëri “Metamorfozis” në partneritet me Koalicionin Rural, e me mbështetjen e qeverisë zvicerane përmes programit “Civica Mobilitas”, përgatiti vlerësim të gjendjes së qeverisjes së mirë të njësive të vetëqeverisjes lokale (NJVL) në Republikën e Maqedonisë së Veriut për vitin 2024.
Vlerësimi është rezultat i hulumtimit të realizuar bazuar në Indeksin e hapjes, i cili ka për qëllim të përcaktojë shkallën në të cilën respektohen parimet e qeverisjes së mirë, në këtë rast nga pushteti lokal në Republikën e Maqedonisë së Veriut. Indeksi i Hapjes bazohet në metodologjinë e Indeksit të Hapjes së NJVL-ve në rajonin e Ballkanit Perëndimor të cilin e zbaton ACTION SEE – rrjeti për përgjegjësi, teknologji dhe Hapje të institucioneve në Evropën Juglindore. Indeksi i merr parasysh dallimet dhe specifikat e secilit prej vendeve, si për sa u përket detyrimeve ligjore për NJVL-të, ashtu edhe për sa u përket praktikave.
Metodologjia u rishikua në fillim të vitit 2021 dhe në fillim të vitit 2024 për t’i përshtatur komponentët e Indeksit (fushat, nënfushat, treguesit, mjetet) për të mundësuar zbatueshmërinë e tij të plotë dhe rëndësinë për vlerësimin e hapjes së NJVL-ve në Republikën e Maqedonisë së Veriut.
Ky raport ofron një analizë të punës së NJVL-ve në Republikën e Maqedonisë së Veriut për sa u përket parimeve të transparencës, vetëdijësimit, qasshmërisë dhe integritetit, me një domen të përbashkët të pranishëm në të katër parimet – të dhënat e hapura. Në bazë të vlerësimit të realizuar, janë dhënë rekomandime për përmirësimin e funksionimit të NJVL-ve në fushat që janë të përfshira në hulumtim.
