Порталб, Мета и Вистиномер ја потпишаа Повелбата за етичко известување за време на изборната кампања

25.09.2021

Во фокусот

Главниот уредник на Новинската агенција – Мета, Горан Ризаов, заедно со главната уредничка на порталот на албански јазик Порталб.мк, Елида Зулбеари како и уредникот на Вистиномер.мк, Владимир Петрески, ја потпишаа Повелбата за етичко известување за време на изборната кампања во 2021 година.

Домаќин на настанот беше Националниот демократски институт (НДИ). Претставниците на медиумите заокружија „Да“ за фер и демократско известување за време на локалните избори во октомври. Повелбата потпишана од медиумите вклучува неколку точки, и тоа:

Принципите на вистинитост и објективност

– Што подразбира потрага по вистината и коректно известување, преку пренесување на фактите на јасен и недвосмислен начин. Во случај на објавување погрешни информации, медиумот ќе стори сè за да ги коригира таквите информации.

Принципот на урамнотеженост

– Што подразбира претставување на различните ставови и гледишта во вистинскиот контекст и без заземање страна кон кој било кандидат, партија или коалиција.

Принципот на јасна дистинкција меѓу информациите и коментарите

– Што подразбира дека информациите ќе се обликуваат на начин што на публиката ќе ѝ биде јасна разликата меѓу фактите и гледиштата и мислењата.

Принципите на чесност и независност

– Што подразбира дека медиумот ќе користи чесен пристап во добивањето информации и во нивното презентирање, избегнувајќи сензационалистички прикази на темите и настаните, како и погрешни претпоставки кои би можеле да ја доведат јавноста во заблуда.

Принципот на професионална солидарност

– Во својата работа медиумот ќе ги поттикнува заемната солидарност и различноста на ставовите и нема да дејствува на начин што ќе значи пресметка со другите медиуми и колеги.

Принципот на уредувачка независност и професионален интегритет

– Медиумот се обврзува да известува на начин што ќе биде независен од какви било лични гледишта, надворешни интереси и влијанија што би можеле да ја поткопаат уредувачката независност и професионален интегритет.

Принципот на почит и толерантност

– Што подразбира почит на достоинството, угледот, правата и личниот интегритет на поединците во информирањето на јавноста. Медиумот во своето известување нема да се служи со стереотипи, предрасуди и дискриминација по ниту една основа и нема да се служи со говорот на омразата и потпалувачки говор.

Принципот на еднакви можности на жените и мажите

– Што подразбира дека медиумите ќе обезбедат еднакви можности за пристап кон медиумските услуги на сите кандидати. Медиумите понатаму ќе се водат од овој принцип и при покривањето на изборните активности на кандидатите.

Принципот на слобода и одговорност

– Што подразбира дека слободата им наметнува одговорност на медиумите за формата и содржината на пораките што ги упатуваат кон јавноста и последиците кои произлегуваат од нив врз поширокото општествено опкружување.

Потписниците на оваа Повелба се согласија да се придржуваат кон овие принципи и активно да се ангажираат во афирмација на етиката и професионалноста во известувањето.

Уредникот на Мета, Горан Ризаов, смета дека почитувањето на овие принципи е задолжително за сите медиуми во секое време без разлика дали е предизборна кампања или не.

„Но, се чини дека не е лошо медиумите од време на време сепак да се потсетат што значи тоа професионализам“, вели Ризаов.

Главната уредничка на Порталб.мк, Зилбеари вели дека Порталб.мк известува професионално не само за време на изборниот период, туку ова е принцип на работа.

„Порталб.мк со години се залага за етичко, професионално и правилно известување. Ова го правиме само кога ги следиме изборите, туку тоа е наш принцип на работа. Ова го должиме пред сé на нашите читатели, кои заслужуваат да бидат правилно информирани за настаните во земјата. Порталб.мк ќе продолжи строго да ги следи правилата и стандардите на професионалното новинарство и секогаш ќе бидеме на страната на правото, без оглед за што и за кого известуваме“, рече Зилбеари.

Домаќинот на овој настан, Роберт Скот Хислет – виш директор на НДИ, рече дека еден од важните елементи на оваа кампања е да се стави крај на насилството врз жените во политиката, со елиминирање на предрасудите, стереотипите, говорот на омраза и сексуалните закани.

„Минатата година НДИ спроведе истражување со 10 политички партии во РСМ и се покажа дека 2 од 3 жени политичари доживеале насилство, една од нив рече дека доживеала насилство од членови на иста партија, додека две од три не го пријавил инцидентот. 72% од овие случаи се случуваат локално “, рече Хислет.

Тој додаде дека ги повикува медиумите да се придружат со заокружување „Да, за фер и демократски избори“, бидејќи според него потпишувањето на ова е првиот чекор во оваа насока.

Локалните избори во РСМ ќе се одржат на 17 октомври годинава, а предизборната кампања ќе започне 20 дена пред датумот на избори.

Сподели:

mediumski-item-img-1.png

Стојановски: Разни актери се обидуваат да ја поткопаат демократијата со дезинформации

Фото: Фисник Џелили, Порталб.мк На годинешната конференција „Дисикон – Интегритетот на информациите“, директорот за партнерства и развој на ресурси во Фондацијата Метаморфозис, Филип Стојановски зборуваше за странските интервенции во поткопувањето на демократијата, како и за работата на Фондацијата Метаморфозис во борбата против дезинформациите, пишува Порталб.мк. Стојановски потврди дека интегритетот на информациите и изборниот интегритет се […]

mediumski-item-img-1.png

Кадрији: Злоупотребите на личните податоци се главно поврзани со компјутерски криминал

Леонора Кадрији, генерален секретар на Агенцијата за заштита на личните податоци (АЗЛП) Околу 60 отсто од сите претставки што Агенцијата за заштита на личните податоци ги добива, се од граѓани кои бараат заштита поради тоа што некој незаконски објавил нивни лични податоци, видеа, фотографии, аудио снимки на социјалните мрежи или други веб страници на интернет […]

mediumski-item-img-1.png

Која е улогата на офицерот за заштита на лични податоци?

Офицерот за заштита на личните податоци (во понатамошниот текст ОЗЛП) игра клучна улога во воспоставувањето и одржувањето на системот за заштита на личните податоци кај трговски друштва, непрофитни организации, државни органи или поединци кои користат лични податоци на физички лица за свои (комерцијални) цели т.н. контролори или користат лични податоци на физички лица за потребите […]