Мени
arwena.png

Археолошкиот дневник – првата книга на Arwena отсега достапна и онлајн

Димитровска Василка – Arwena, една од најпопуларните македонски блогерки и единствен археолог од Македонија кој пишува на интернет, ја објави својата прва збирка текстови “Археолошки дневник” во електронска форма, под Криејтив комонс лиценца.

arwena.png Збирката, насловена исто како и блогот на Arwena, се состои од избор на постови пишувани исклучиво он-лајн и не го отсликуваат во целост нејзиното мислење, бидејќи во конципирањето на книгата повеќе значење се придодало на научно-популарните текстови.

„Мислам дека успешно ја одбегнав замката сите овие години да бидам само уште една репликација на македонските весници и секојдневието кое не опкружува. Се надевам дека преку Археоблогот успеав барем делумно во обидот на сите вас да ви ја пренесам идејата оти археологијата не е само наука за минатото и мртвите луѓе. Дека е присутна помеѓу нас во секое време и во секаков облик. Всушност с(ветот)è околу нас е археологија“ – изјави Димитровска.

Блогот на Arwena е еден од ретките тематски блогови на македонски јазик, кои во исто време се квалитетни, популарни и атрактивни со издржани научни текстови, критики, анализи и свои ставови кои, во нејзиниот случај, од почетокот на блогирањето одат под лиценцата на Криејтив Комонс. Содржините објавувани на овој блог се групирани во повеќе категории, но генерално може да се издвојат две поголеми области: археологијата (општо, но и со осврт на актуелните случувања на тоа поле во Македонија), како и со споделување лични искуства од сопствената кариера на авторката.

„Во 21 век кога светот стана глобално село, знаењето не треба да се крие, туку да се споделува. За еден подобар свет. Затоа оваа книга е подарок од мене до сите вас. А ќе ги има и понатаму, во хард копи или е-форма.“

Книгата „Археолошки дневник“ прво беше издадена во печатена форма од страна на издавачката куќа „Аквариус пет“, како дел од едицијата „Блог записи“. Сега е достапна и во електронска верзија под Криејтив комонс лиценцата Наведи извор-Некомерцијално 3.0 Unported, а во неа дополнително е вклучена рецензија за делото од Букарски.

Поврзани натписи