Зајакнувањето на регионалната кибер безбедност е цел кон која Фондацијата Метаморфозис ги фокусира своите капацитети веќе подолго време. Во таа насока извршниот директор на фондацијата Бардил Јашари ја претставуваше Метаморфозис на конференцијата Сајбер зиро (Cyber Zero), одржана во Приштина од 4 до 5 март 2024 година.
Овој настан, организиран од албанската асоцијација за кибер безбедност со поддршка од Амбасадата на САД во Приштина, собра експерти и креатори на политики од целиот регион за да разговараат за итни прашања во кибер безбедноста и зголемената загриженост за дигиталните дезинформации.
За време на конференцијата, Јашари даде значаен придонес на панелот за вештачка интелигенција и дезинформации. Тој сподели непроценливи сознанија од нашата земја, покажувајќи како вештачката интелигенција (ВИ) се искористува за добро, но и за нанесување на штета.
Господинот Јашари истакна конкретни примери каде вештачката интелигенција била искористена за ширење дезинформации, особено околу критичните периоди на изборите, за да се искриви реалноста и да се збуни јавноста.
Тој ги нагласи моќните перформанси на вештачката интелигенција во модерното време истакнувајќи дека технологијата која претходно се користеше за измамување и манипулирање, сега е уште помоќна. За време на дискусијата тој ги подвлече предизвиците со кои се соочуваат општествата бидејќи дезинформациите стануваат пософистицирани, барајќи понијансиран и сеопфатен пристап за справување.
Господинот Јашари повика на „сеопфатен општествен пристап“ за борба против заканата од дезинформации. Тој тврди дека иако дигиталната и медиумската писменост се фундаментални за опремување на граѓаните да се движат низ сложеноста на дигиталниот свет, овие мерки сами по себе се недоволни. Потребата од моќни механизми за проверка на фактите и како и наративна анализа беше истакната како клучна во разликувањето на вистината од лагата и заштитата на демократските процеси.
Сподели:
