Si pjesë e Programit për Aktivizëm Digjital, përfaqësues nga Fondacioni Metamorfozis morën pjesë në konferencën Global Fact 11 të mbajtur në Sarajevë, Bosnje dhe Hercegovinë, nga 26 deri më 28 qershor 2024.
Verifikimi i fakteve ofron kontekst thelbësor për debatet publike dhe nuk duhet të shihet si shtypje e fjalës, deklaruan verifikuesit e fakteve nga e gjithë bota në samitin e 11-të global për verifikimin e fakteve në Bosnje dhe Hercegovinë.
Të paktën 130 organizata për verifikimin e fakteve nga 80 vende të ndryshme të botës nënshkruan Deklaratën e Sarajevës, duke konfirmuar verifikimin e fakteve si një pjesë integrale të lirisë së fjalës pasi kërkon hapje, transparencë dhe ruajtjen e informacionit. Deklarata u nënshkrua zyrtarisht nga pjesëmarrësit në takimin vjetor të koordinuar nga Rrjeti Ndërkombëtar i Verifikimit të Fakteve (IFCN).
“Verifikimi i fakteve synon të ofrojë informacion shtesë, duke paraqitur prova për të korrigjuar dhe sqaruar mesazhet që janë të rreme, mashtruese ose që mungojnë në kontekst të rëndësishëm,” thuhet në një pjesë të deklaratës.
“Verifikimi i fakteve nuk synon të fshijë këto mesazhe, por t’i ruajë ato si pjesë e debatit publik, duke ofruar prova të nevojshme për informacion të saktë në debat,” shtohet.
Verifikuesit globalë të fakteve lëshuan deklaratën pas viteve të përballjes me sulme të vazhdueshme kundër tyre, mes pretendimeve për censurë në internet, të cilat çuan në disa raste të abuzimit dhe ngacmimit në të gjithë botën. Këto pretendime janë të pabazuara sepse “censura heq informacionin [ndërsa] verifikimi i fakteve i shton atë.”
Lexoni deklaratën e IFCN nga Sarajeva për lirinë e shprehjes dhe verifikimin e fakteve këtu.
Ndaje:
