Фото: Метаморфозис
Фондација Метаморфозис, во партнерство со Меѓународниот центар за новинари (International Center for Journalists – ICFJ), а со поддршка на Амбасадата на САД во Скопје, го отвора четвртиот повик за учество на заинтересирани млади од Источниот и Североисточниот регион во Програмата за медиумска обука, „Дезинформации и проверка на факти“.
Обуката ќе се одржи од 24 до 26 мај 2023 година во Штип, ќе се одвива на англиски јазик, а крајниот рок за аплицирање е 22 мај 2023 година. Право на пријавување имаат млади на возраст до 29 години преку пополнување на формуларот на следниот линк: https://icfj.tfaforms.net/4995004.
Преку оваа програма, најдобрите учесници ќе имаат можност за практиканство во медиумите на Метаморфозис: Мета, Порталб или Вистиномер, а двајца од нив ќе имаат можност да поминат еднонеделна студиска посета во САД.
Обучувач на четвртата обука „Дезинформации и проверка на факти“, меѓу останатите, ќе биде еминентниот новинар Џон Гринберг, дописник на PolitiFact.
Гринберг бил дел од тимот на PolitiFact за време на претседателските избори во 2012 година и е еден од проверувачите на факти кои го основаа PunditFact во 2013 година – проект посветен за проверка на точноста на тврдењата на експерти, колумнисти, блогери, политички аналитичари, водители и гости на ток-шоуа. Гринберг два пати бил добитник на награди од Здружението на професионални новинари за истражувачко известување.
ICFJ и Фондацијата Метаморфозис го спроведуваат проектот во три фази во текот на 2023 година и тој вклучува четири тродневни работилници. Обуките се дел од програмата „Новинарство за новата генерација: Програма за медиумска обука“ на Фондација Метаморфозис во партнерство со Меѓународниот центар за новинари (International Center for Journalists – ICFJ), а со поддршка на Амбасадата на САД во Скопје.
Сподели:
